Ս. ՍՏԵՓԱՆՈՍԻ ՏՕՆԸ

ԱՆԹԻԼԻԱՍԻ ՄԷՋ

Read in Arial Armenian font

12/25/2009 

Քրիստոնէական եկեղեցւոյ Նախավկայ Ս. Ստեփանոս նախասարկաւագի տօնին առիթով Անթիլիասի Ս. Գրիգոր Լուսաւորիչ Մայր Տաճարին մէջ տեղի ունեցաւ եկեղեցական յատուկ արարողութիւն, նախագահութեամբ Ն.Ս.Օ.Տ.Տ. Արամ Ա. Կաթողիկոսի: 

Արդարեւ, Սարկաւագաց տօնին առիթով, հանդիսաւոր ժամերգութիւնը եւ նախատօնակը կատարուեցաւ Ուրբաթ 25 Դեկտեմբեր 2009-ի երեկոյեան ժամը 4.30-ին: Նախատօնակի ընթացքին, Դպրեվանքի սարկաւագաց դասը քահանայական սաղաւարտներով խնկարկութիւն կատարեց Աստուծոյ Սուրբ Խորանին, ծառայական այս աստիճանին խոնարհ օրինակը ցոյց տալով: 

Ս. Ստեփանոսի տօնը ըլլալով Սարկաւագաց յատուկ տօն, Դպրեվանքի սարկաւագաց դասը դասախօսական յատուկ յայտագիր պատրաստած էր, որ տեղի ունեցաւ օր մը առաջ՝ 24 Դեկտեմբեր 2009-ի երեկոյեան, Դպրեվանքի ՙԲրաբիոն Տումանեան՚ հանդիսասրահին մէջ, Պիքֆայա, որուն ներկայ գտնուեցան Միաբան Հայրեր:  

Բարեշնորհ Սարկաւագները իրենց ներկայացուցած ձեռնարկով, դասախօսական ելոյթներով ու գեղարուեստական յայտագրով, հաւատարմութեան խօսք արտասանեցին, անսակարկ ծառայելու մեր եկեղեցւոյ ու ազգին, որպէսզի ապագային դառնան ՙմշակք առանց ամօթոյ՚: Գլխաւոր դասախօսութիւնը ներկայացուեցաւ Բարշ. Գէորգ Սրկ. Արապեանի կողմէ, որ  Մեծի Տանն Կիլիկիոյ Կաթողիկոսութեան բազմաճիւղ առաքելութեան մէջ շեշտեց սարկաւագաց դասին բերած փոքրիկ ծառայութիւնը: Ան ըսաւ, որ նուազագոյն ծառայութիւնն իսկ իր տեղը ունի հաւաքական աշխատանքին մէջ: 

Նախատօնակի ժամերգութենէն ետք Մայրավանքի սեղանատան մէջ տրուեցաւ սիրոյ սեղան, որուն սպասարկեցին Դպրեվանքի սարկաւագներ, ծառայութեան գործնական օրինակը տալով: 

Վեհափառ Հայրապետը իր խօսքը ուղղելով ուսանողութեան, ու յատկապէս սարկաւագաց դասուն, թելադրեց կարգ ու կանոնի գիտակցութիւնը միշտ վառ պահել իրենց կեանքին մէջ: Նորին Սրբութիւնը կարեւորութեամբ անդրադարձաւ օրէնքին բերած բարիքներուն մարդու կեանքէ ներս, առանց որուն, քաոսի կը վերածուի մարդկային ընկերութեան կեանքը, ըսաւ ան: Ի վերջոյ, Վեհափառ Հայրապետը յոյս յայտնեց, որ իւրաքանչիւր Դպրեվանեցիի մէջ նոր Սուրբ Ստեփանոս մը կը ծնի, իր ծառայասիրութեամբ, նուիրումով ու զոհողութեան գիտակցութեամբ ուրիշներէ զատորոշուող:  

Սուրբ Ստեփանոսի Տօնը նաեւ առիթ հանդիսացաւ, որ Դպրեվանքի աւելի խոնարհ դասարանի աշակերտներ հետեւին սարկաւագաց դասու օրինակին, հետեզհետէ բարձրանալու համար հայ եկեղեցւոյ նուիրապետական աստիճաններէն՝ մեր եկեղեցւոյ ու ազգին ծառայելու քաղցր կոչումով:

ԿՈՄԻՏԱՍ ՎԱՐԴԱՊԵՏԻ ԾՆՆԴԵԱՆ 140-ՐԴ ԱՄԵԱԿԻ ՆՇՈՒՄ

ԴՊՐԵՎԱՆՔԷՆ ՆԵՐՍ

Read in Arial Armenian font 

12/18/2009

140 տարիներ անցած են մեծահռչակ հայազգի երաժիշտ՝ Կոմիտաս (աւազանի անունով Սողոմոն Սողոմոնեան) Վարդապետի ծննդեան թուականէն: Առ այդ, նախաձեռնութեամբ Դպրեվանքի Տեսչութեան, Ուրբաթ 18 Դեկտեմբեր 2009-ին, երեկոյեան ժամը 7-ին, տեղի ունեցաւ դասախօսական երեկոյ մը, Դպրեվանքի հանդիսասրահին մէջ: Օրուան բանախօսն էր, Մեծի Տանն Կիլիկիոյ Կաթողիկոսութեան Քրիստոնէական Դաստիարակութեան Բաժանմունքի վարիչ՝ Հոգշ. Տ. Թորգոմ Աբղ. Տօնոյեան:

Բացման խօսքով հանդէս եկաւ, Բ. Ընծայարանի Կիսասարկաւագներէն Յարութիւն Կիս.սրկ. Շխրտըման, որ ընդհանուր գիծերու մէջ ներկայացուց հայ եկեղեցական ու ժողովրդային երաժշտութիւնը եւ անդրադարձաւ Կոմիտաս Վարդապետի կատարած երախտարժան գործին՝ հայ գեղջկական երգերու հաւաքումի աշխատանքին:

Ապա, բեմ հրաւիրուեցաւ օրուան բանախօսը, որ նախ հակիրճ կէտերու մէջ ներկայացուց թէ ի՜նչ է երաժշտութիւնը, ի՜նչ կարեւորութիւն կը ներկայացնէ մարդ անհատի կեանքէն ներս, եւ թէ ինչպէ՜ս մարդը ՙդէպի Աստուած կ’առաջնորդէ՚: Ապա, Հոգշ. Հայր Սուրբը անդրադարձաւ Հայկական երաժշ-տութեան: Ան ընդհանուր գիծերու մէջ ներկայացուց Կոմիտաս Վարդապետը, տալով անոր կենսագրական գիծերը եւ կատարած աշխատանքները: Հայր Սուրբը մանաւանդ անդրադարձաւ Կոմիտաս Վարդապետի իւրայատուկ ոճին:

Դասախօսութեան ընթացքին Կոմիտաս Վարդապետի դաշնաւորումներէն երկու կտորներ ունկնդրեցին Դպրեվանեցիները, դասախօս Հայր Սուրբին կատարումով:

Երեկոն եզրափակեց Դպրեվանքի Տեսուչ՝ Գերշ. Տ. Շահէ Եպս. Փանոսեան: Ան թելադրեց դպրեվանեցիներուն, որ բազմամշակոյթ այս ընկերութեան մէջ, ուր բազմազան երաժշտութիւններ կը հնչեն, գիտնան արժէքը հայ երաժշտութեան, ու մանաւանդ տոհմիկ, ազգային, գեղջկական երաժշտութեան, որուն հաւաքողը ու մեզի կտակողը եղաւ անմահանուն Կոմիտաս Վարդապետը:

ՍՈՒՐԲ ՅԱԿՈԲ ՄԾԲՆԱՑԻ ՀԱՅՐԱՊԵՏԻՆ

ՄԱՐՈՒԳԷ ՃԳՆԱՒՈՐԻՆ ԵՒ ՄԵԼԻՏՈՍ ԵՊԻՍԿՈՊՈՍԻՆ

Ի ՅԻՇԱՏԱԿ ԳԵՂԱՐՈՒԵՍՏԱԿԱՆ ԵՐԵԿՈՅ

ԴՊՐԵՎԱՆՔԷՆ ՆԵՐՍ

Read in Arial Armenian font 

12/11/2009

Ուրբաթ, 11 Դեկտեմբեր 2009-ի յետմիջօրէին, Դպրեվանքի ՙԲրաբիոն Տումանեան՚ հանդիսասրահէն ներս տեղի ուեցաւ գեղարուեստական յայտագիր մը, նուիրուած Սուրբ Յակոբ Մծբնացի Հայրապետին, Մարուգէի ճգնաւորին եւ Մելիտոս Եպիսկոպոսին, զոր կազմակերպեցին ու ներկայացուցին Դպրեվանքի Գ. Ժառանգաւորաց դասարանի ուսանողները:

Անոնք ներկայացուցին երեք սուրբերուն կենսագրական գիծերը եւ անոնց հաւատքի գործունէութիւնը: Յայտագիրը ընդգրկեց նաեւ շարականի երգեցողութիւն եւ կենդանի պատկերի ներկայացում:

Աւարտին, Դպրեվանքի Տեսուչ՝ Գերշ. Տ. Շահէ Եպս. Փանոսեան գնահատեց Գ. ժառանգաւորացի սաները իրենց տարած աշխատանքին համար, եւ խօսքը դպրեվանեցիներուն ուղղելով թելադրեց, որ հետեւին սուրբերու կեանքին եւ փորձեն անոնց նմանիլ:

Ս. ԹԱԴԷՈՍ ԵՒ Ս. ԲԱՐԹՈՒՂԻՄԷՈՍ

ԱՌԱՔԵԱԼՆԵՐՈՒՆ ՏՕՆԸ ԴՊՐԵՎԱՆՔԷՆ ՆԵՐՍ

Read in Arial Armenian font 

11/27/2009

ՙՍիրեցէք ձեր թշնամիները, օրհնեցէ՜ք ձեզ անիծողները, բարիք ըրէք ձեզ ատողներուն եւ աղօթեցէք անոնց համար որոնք ձեզ կը չարչարեն ու կը հալածեն՚ (Մտ 5.44): Այսպէս ըրին Հայաստանեայց Առաքելական Սուրբ Եկեղեցւոյ առաջին լուսաւորիչները՝ Ս. Թադէոսն ու Ս. Բարթուղիմէոսը, որոնց յիշատակը նշեցին Դպրեվանքի Դ. Ժառանգաւորացի սաները, Ուրբաթ 27 Նոյեմբեր 2009-ի երեկոյեան, Դպրեվանքի ՙԲրաբիոն Տումանեան՚ հանդիսասրահէն ներս: Սոյն գեղարուեստական ձեռնարկին, Դպրեվանքի տեսչութեան կողքին ներկայ էր նաեւ Մայր Տաճարի փոխ-լուսարարապետ՝ Հոգշ. Տ. Ստեփանոս Վրդ. Փաշայեանը:

Բացման խօսքով հանդէս եկաւ Հրայր Տաղլեանը, որ իր խօսքին մէջ ըսաւ. ՙԱռաքեալներու վարքը կարդալով եւ անոնց մասին լսելով պէտք չէ բաւարարուինք, այլ՝ անոնց կեանքէն ճառագայթող գործերն ու անոնց անբասիր կենսատիպը պէտք է ի գործ դնենք մեր ներկայ կեանքին մէջ: Անոնք թէեւ հեռացան այս աշխարհէն, սակայն կ’ապրին մեր սրտերուն մէջ՚: Ապա մէջընդմէջ կատարուեցան Սուրբ Գիրքէն ընթերցում՝ Աբրահամ Կիրակոսեան, կենդանի պատկերի ներկայացում, Ս. Թադէոս առաքեալին կեանքն ու գործունէութիւնը՝ Վիգէն Քիւրքլեան, Նարեկ աղօթամատեանէն ընթերցում՝ Յակոբ Քարտանաքեան, Ս. Բարթուղիմէոս առաքեալի կեանքն ու գործունէութիւնը՝ Գաբրիէլ Եղիայեան, որմէ ետք՝ ՙԵրանելի Սուրբ Առաքեալք…՚ շարականի երգեցողութիւն՝ Չորրորդ Ժառանգաւորացի ուսանողներուն կողմէ:

Աւարտին, Դպրեվանքի Տեսուչ՝ Գերշ. Տ. Շահէ Եպս. Փանոսեան իր սրտին խօսքը ուղղեց Դպրեվանեցիներուն: Նախ գնահատեց Դ. Ժառանգաւորացի ուսանողներուն տարած աշխատանքը, Բ. Ընծայարանի Կիսասարկաւագներէն՝ Բրշ. Սամուէլ Լախոյեանի եւ Յարութիւն Շըխրտմեանի առաջնորդութեամբ: Ապա անդրադառնալով օրուան խորհուրդին, Սրբազան Հայրը կարեւորութեամբ շեշտեց Առաքեալներուն տարած մեծ աշխատանքը՝ քրիստոնէութեան լոյսը Հայաստան աշխարհին մէջ տարածելու. ան իր խօսքին մէջ ըսաւ. ՙԱռաքեալները Աւետարանի Լոյսը Հայաստան բերին, ա՜յն Լոյսը՝ որ մեր Տէրը Յիսուս Քրիստոս երկինքէն աշխարհ բերաւ՚. ապա անդրադառնալով Առաքելաներուն մասին մեր ունեցած տեղեկութիւններուն եւ անոնց սրբութեան, ըսաւ. ՙՇատ բան չենք գիտեր անոնց մասին, սակայն իրենց յիշատակէն կը ճառագայթէ սրբութիւն մը, եւ մենք աշխարհով մէկ կը յայտարարենք, որ աշխարհի առաջին քրիստոնեայ պետութիւնն ու ժողովուրդն ենք…՚: Ապա անդրադառնալով սուրբերուն մե՜ր կեանքին մէջ ներկայութեան, ըսաւ. ՙՍուրբերը մեզմէ հեռու չեն, այլ կ’ապրին մեզմէ իւրաքանչիւրին կեանքին մէջ՚: Ի վերջոյ, Սրբազան Հայրը քաջալերեց Դպրեվանեցիները որպէսզի հետեւին սուրբ Առաքեալներու օրինակին անմար պահելով առաքելահիմն մեր Սուրբ Եկեղեցւոյ Ուղղափառ Հաւատքը:   

ՀԱՅ-ԹՐՔԱԿԱՆ ԱՐՁԱՆԱԳՐՈՒԹԻՒՆՆԵՐՈՒՆ ԵՒ ՎԵՐՋԻՆ ԻՐԱԴԱՐՁՈՒԹԻՒՆՆԵՐՈՒՆ ՄԱՍԻՆ ԴԱՍԱԽՕՍՈՒԹԻՒՆ ԴՊՐԵՎԱՆՔԷՆ ՆԵՐՍ

Read in Arial Armenian font

11/13/2009

Զուիցերիոյ մէջ վերջերս Հայաստանի Հանրապետութեան եւ Թուրքիոյ միջեւ ստորագրուած արձանագրութիւններու մասին դպրեվանեցիները տեղեակ պահելու նպատակով, դասախօսական երեկոյ մը կազմակերպուեցաւ Դպրեվանքէն ներս, նախաձեռնութեամբ Տեսչութեան: Օրուան դասախօսն էր Տիար Շահան Գանտահարեան:

Ուրբաթ 13 Նոյեմբեր 2009-ին, Դպրեվանքի հանդիսասրահին մէջ տեղի ունեցած ձեռնարկին բացման խօսքը կատարեց Յարութիւն Կիս. Սրկ. Շէրնէզեան, որ անդրադարձաւ իրադարձութիւններուն, եւ ներկայացուց դասախօսին կենսագրական գիծերը: Ապա, Սամուէլ Կիս. Սրկ. Լախոյեանը արտասանեց Դանիէլ Վարուժանի ՙԴերենիկ՚ը, որմէ ետք բեմ հրաւիրուեցաւ օրուան դասախօսը:

Շ. Գանտահարեան նախ անդրադարձաւ սոյն արձանագրութիւններուն տեղի տուող ենթահողին: Ան մատնանշեց թէ ճիշդ է, որ Հայ-Թրքական յարաբերութիւններ տարազին մէջ կ’ըմբռնուի այս իրողութիւնը, սակայն՝ իրականութեան մէջ ՙՀայաստան-Թուրքիա ծիրէն ներս պէտք է դիտել հարցը եւ ոչ թէ Հայ-Թրքական, որովհետեւ եթէ այդպէս ըլլայ նաեւ Սփիւռքահայութիւնը կը ներառնուի, եւ բոլորս ալ գիտենք, որ Սփիւռքահայութիւնը իր վճռական Ո՜Չը ըսաւ սոյն արձանագրութիւններուն՚: Անդրադառնալով Հայաստան-Սփիւռք յարաբերութեան ու գործակցութեան, դասախօսը լուսարձակի տակ առաւ Թուրքիոյ կառավարութեան գործադրած դիւանագիտութիւնը եւ ըսաւ. ՙԶգոյշ պէտք է ըլլալ, որովհետեւ թրքական խաղը Սփիւռքը ո՜չ թէ տարանջատել է Հայաստանէն, այլ Սփիւռքն ու Հայաստանը հակադրել է իրարու՚: Գանտահարեան մանրամասնօրէն բացատրեց արձանագրութիւններուն բովանդակութիւնը եւ ապագային անոնց ունենալիք ազդեցութիւնները: Դասախօսութեան աւարտին, առիթ տրուեցաւ հարցումներու: Ղարաբաղեան հարցին մասին հարցումի մը պատասխանելով, Ան ըսաւ. ՙՀայաստանի համար Ղարաբաղը անկախ է եւ որեւէ ձեւով չի՜ վերադառանար Ազրպէյճեանի: Այս մէկը բոլորն ալ կ’ըսեն, Նախագահ Սարգսեան, Վարչապետն ու իշխանութեան գլուխ եղող բոլոր անդամները: Հայաստանի համար Ղարաբաղը անժխտելիօրէն ՀԱՅ է՚: 

Աւարտին, Դպրեվանքի Տեսուչ Գերշ. Տ. Շահէ Եպս. Փանոսեան, յանուն Դպրեվանքի Տեսչութեան ու Ուսանողութեան, իր խորին շնորհակալութիւնն ու գնահատանքը յայտնեց Շահան Գանտահարեանին: Ան իր խօսքը Դպրեվանեցիներուն ուղղելով, թելադրեց հայկական պահանջատիրութեան ոգին միշտ վառ պահել եկող սերունդներու հոգիին մէջ, մեր Նահատակներու սուրբ կտակին հաւատարմութեամբ:

ՙԱՂՕԹՔԻ ՄՐՑՈՒՄ՚ ԴՊՐԵՎԱՆՔԷՆ ՆԵՐՍ

Read in Arial Armenian font

Մեծի Տանն Կիլիկիոյ Կաթողիկոսութեան Դպրեվանքին մէջ տարիներէ ի վեր հաստատուած աւանդութեան համաձայն, այս տարի եւս կազմակերպուեցաւ ՙԱղօթքի Մրցում՚ մը, նորեկ Դպրեվանեցիներու մէջ արթնցնելու համար աղօթքի սէրը, ոգին եւ ապրումը: 

Միքայէլ Կիս. Սրկ. Սարգիսեան բացման խօսքը կատարեց եւ հակիրճ ձեւով բացատրեց թէ ի՜նչ կը նշանակէ ՙմրցիլ՚, յատկապէս աղօթքի պարագային: ՙԱղօթք՚ եւ ՙԱղօթել՚ հասկացութեանց մասին ապա ամփոփ խորհրդածութիւն մը կատարելով, ան իր մտածումները հիմնաւորեց Աւետարանին մէջ Յիսուսի տուած բազմաթիւ օրինակներով, ու յատկապէս Աստուածորդիին կողմէ տրուած բացատրութիւններով:

Ապա, դատակազմի անդամներ նշանակուեցան Գէորգ Սրկ. Արապեան (Դ. Ընծ.), Կիրակոս Սրկ. Թովմասեան (Գ. Ընծ.) եւ Վրէժ Կիս. Սրկ. Կրպոյեան (Բ. Ընծ.), որոնք վարեցին մրցումը: Նորեկ Դպրեվանեցիները յաջորդաբար բեմ բարձրացան եւ իրենց մասնակցութիւնը բերին: Աւարտին, դատակազմի անդամները ճշդեցին երեք լաւագոյն մասնակիցները: Իբրեւ գեղարուեստական յայտագիր, չորրորդ ժառանգաւորացի սաներէն՝ Ստեփանեան Յովհաննէս ու Երրորդ ժառանգաւորացի սաներէն՝ Քէհէյեան Յարութիւն, փոխն ի փոխ Հայ եւ Ընդհանրական Եկեղեցւոյ Հայրերէն ընթերցեցին մտածումներ աղօթքի մասին:

            Առաջին հանդիսացաւ Առաքելեան Խաչիկ.

            Երկրորդ՝ Չորպաճեան Յարութիւն: Եւ

            Երրորդ՝ Գոզանեան Մանուկ եւ Սէլլումեան Ժանօ:

 Դպրեվանքի Տեսուչ Գերշ. Տ. Շահէ Եպս. Փանոսեան եզրափակեց երեկոն, իր գնահատանքը յայտնելով բոլոր մասնակիցներուն: Ան շնորհաւորեց մրցակակիրները եւ թելադրեց որ աղօթանուէր կեանքի ամէն յարմարութիւն ունեցող Դպրեվանքի յարկը դառնայ իրենց խոկումի վայրը, առօրեայ եկեղեցական արարողութիւններով ու ընդհանրապէս աղօթքի մթնոլորտով:

ԱՆԹԻԼԻԱՍԻ ԴՊՐԵՎԱՆՔԻ ԲԱՑՈՒՄ

Read in Arial Armenian font

10/11/2009

Կիրակի, 11 Հոկտեմբերին, Անթիլիասի Մայրավանքի Վեհարանի Դահլիճին մէջ տեղի ունեցած հանդիսութեան ընթացքին, Ն.Ս.Օ.Տ.Տ.  Արամ Ա. Կաթողիկոս պաշտօնապէս բացուած յայտարարեց Մեծի Տանն Կիլիկիոյ Կաթողիկոսութեան Դպրեվանքի կրթական 80-րդ տարեշրջանը:

Աւանդութեան համաձայն, նոյն օրը Մայր Տաճարին մէջ պատարագեց Դպրեվանքի Տեսուչ Գերշ. Տ. Շահէ Եպս. Փանոսեան: Տեսուչ Սրբազանը, մեկնելով Քրիստոսի խօսքէն, թէ դուք էք լոյսը աշխարհին, Դպրեվանքի առաքելութիւնը բնորոշեց որպէս աշխարհին լոյս տանելու կոչուած մարդոց պատրաստութեան նուիրուած հոգեւոր հնոց: Ան շեշտեց Դպրեվանքի կարեւորութիւնը մեր եկեղեցւոյ ու ժողովուրդի կեանքէն ներս: Իր ջերմ շնորհակալութիւնը յայտնեց Վեհափառ Հայրապետին, որ մօտէն կը հետեւի Դպրեվանքի գործունէութեան:

Սուրբ եւ անմահ պատարագէն յետոյ, Դպրեվանքի աշակերտութիւնը բարձրացաւ Վեհարան, լսելու համար Վեհափառ Հայրապետին պատգամը: Ներկայ էին նաեւ միաբան հայրեր, ուսուցիչներ, Ազգ. Կեդր. Վարչութեան անդամներ ու հաւատացեալներ: Տեղի ունեցաւ գեղարուեստական կարճ յայտագիր մը, որու ընթացքին երգուեցան օրուան խորհուրդին յատուկ շարականներ, կարդացուեցան հատուածներ՝ Աւետարանէն ու Նարեկէն: Խօսք առաւ Տեսուչ Սրբազանը, եւ ուրախութեամբ յայտնեց, որ Դպրեվանքը վերանորոգ հաւատքով ու նուիրումով պատրաստ է սկսելու իր 80-րդ կրթական տարեշրջանը:

Վեհափառ Հայրապետը իր եզրափակիչ խօսքին մէջ յիշեցուց ներկաներուն թէ Դպրեվանքը սովորական դպրոց մը չէ, եւ հետեւաբար սովորական մարդոց վայրը չէ: Հոն մարդիկ կը պատրաստուին առաքելութեան մը համար, ըսաւ ան: Մէջբերելով Դպրեվանքին քայլերգէն հետեւեալ բառերը՝ ՙկրօնի հուր եւ ազգի սէր՚, Վեհափառը շեշետեց, թէ եկեղեցին ու ազգը, հաւատքը ու ազգային գերագոյն արժէքները միշտ ներդաշնակ կերպով գոյակցած են մեր ժողովուրդի կեաքնէն ներս: Ա՜յս գիտակցութեամբ մենք Դպրեվանքի մէջ հայ եկեղեցւոյ սպասաւորներ կը կազմաւորենք, ըսաւ Վեհափառ Հայրապետը: Ան վերաշեշտեց Դպրեվանքին վիճակուած կարեւոր դերը մեր եկեղեցւոյ ու ազգի կեանքէն ներս, ըսելով, թէ ՙմեզի համար այնքան  կարեւոր է Դպրեվանքը, որ հակառակ իմ բազմազբաղ վիճակիս, շաբաթը մէկ անգամ կը բարձրանամ Դպրեվանք, աստուածաբանութիւն դասաւանդելու Դպրեվանքի աւարտական դասարանին՚: Վեհափառ Հայրաոպետը գնահատեց Դպրեվանքի, Տեսուչին, Տեսչութեան անդամներուն եւ ուսուցիչներուն կատարած աշխատանքը, թելադրելով որ առաւել նախանձախնդրութեամբ շարունակեն իրենց վստահուած առաքելութիւնը:

ԽՆՁՈՐՀԱՒԱՔ ՊԻՔՖԱՅԱՅԻ ԴՊՐԵՎԱՆՔԻՆ ՄԷՋ

Read in Arial Armenian font

09/03/2009

Հինգշաբթի 3 Սեպտեմբեր 2009-ի առաւօտուն, արեւածագէն իսկ առաջ, Դպրեվանքի սարկաւագներ եւ սաներ, հսկիչ Հայր Սուրբին՝ Հոգշ. Տ. Վարանդ Աբղ. Քորթմոսեանի առաջնորդութեամբ, ուղուեցան դէպի Դպրեվանքի պարտէզը, կատարելու համար այս տարուան խնձորհաւաքը: Անոնց աշխատանքի եռանդն ու խանդավառութիւնը աւելցաւ, երբ իրենց աշխատանքին իր մասնակցութիւնը բերաւ նաեւ Հոգշ. Տ. Ստեփանոս Աբղ. Փաշայեան: Ամբողջ օրուան աշխատանքէն ետք, պարտէզին բոլոր հասուն խնձորները զտեղուեցան յատուկ տուփերու մէջ, որպէսզի ձմրան եղանակին, Դպրեվանեցիներուն հրամցուին:

Դպրեվանքի կեանքէն ներս, արտադասարանային աշխատանքներուն մէջ կարեւոր տեղ ունի պարտէզը: Աստուածապարգեւ բնութեան հետ աշակերտութեան կապը, ինչպէս նաեւ անոր նկատմամբ հոգածութիւնը, մարդու կազմաւորման կարեւոր ազդակներէն են:

ԴՊՐԵՎԱՆՔ ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ

ՆՈՐ ՍԱՆԵՐՈՒ

ԱՐՁԱՆԱԳՐՈՒԹԻՒՆ

Read in Arial Armenian font

Մեծի Տանն Կիլիկիոյ Կաթողիկոսութեան Դպրեվանքը, հարստացած 79 տարիներու կրթական փորձառութեամբ եւ իրագործումներով, վերանորոգ հաւատքով կը շարունակէ իր կրթական առաքելութիւնը:

Դպրեվանքի ուսումնական ծրագիրը հիմնուած է գլխաւոր երեք առանցքներու շուրջ.- հայագիտութիւն, կրօնագիտութիւն եւ գիտութիւն: Դպրեվանքէն ներս, Հայերէն լեզուի կողքին, կը դասաւանդուին Գրաբար, Արաբերէն, Անգլերէն ու Ֆրանսերէն:

Դպրեվանքէն շրջանաւարտ եղողները կրնան դառնալ հոգեւորական կամ ուսուցիչ եւ կամ, տարբեր համալսարաններու մէջ հետեւիլ մասնագիտութիւններու:

Դպրեվանք կ՜ընդունուին նախակրթարանի 6-րդ դասարանը աւարտած ուսման ատակ աշակերտներ: Կ՜ընդունուին նաեւ աւելի բարձր կարգերէն դիմում կատարող թեկնածուներ:

Դպրեվանքի 2009-2010 կրթական տարեշրջանը պիտի սկսի Երկուշաբթի, Հոկտեմբեր 12, 2009-ին:

2009-2010 տարեշրջանին համար նոր սաներու արձանագրութիւնը կը սկսի Օգոստոս 1, 2009 եւ կը փակուի Հոկտեմբեր 5, 2009-ին:

Անոնք որոնք կը փափաքին իրենց զաւակը Դպրեվանք ղրկել, բարեհաճին ամէն առաւօտ, ժամը 9:00-12:00-ի միջոցին, բացի Շաբաթ օրերէն, հանդիպիլ Պիք‎ֆ‎այա, դպրեվանքի տեսչութեան, եւ կամ, Անթիլիասի Կաթողիկոսարանէն ներս ներկայանալ Հոգեշնորհ Տէր Ստեփանոս Աբղ. Փաշայեանին:

Յաւելեալ տեղեկութեանց համար կարելի է տեսչութեան հետ կապուիլ +961 4 983 634 եւ +961 4 983 635 հեռաձայնի թիւերով:

ՏԵՍՉՈՒԹԻՒՆ

ՙԴՊՐԵՎԱՆՔԸ ՎԵՐԱՆՈՐՈԳ ՀԱՒԱՏՔՈՎ ԿԸ ՇԱՐՈՒՆԱԿԷ ՄԱՐԴԱԿԵՐՏՈՒՄԻ ԻՐ ԱՌԱՔԵԼՈՒԹԻՒՆԸ՚

                        ԸՍԱՒ ԱՐԱՄ Ա. ԿԱԹՈՂԻԿՈՍ

Read in Arial Armenian font

06/12/2009 

Ուրբաթ, 12 Յունիսի երեկոյեան, Ն.Ս.Օ.Տ.Տ. Արամ Ա. Կաթողիկոս այցելեց Մեծի Տանն Կիլիկիոյ Կաթողիկոսութեան Դպրեվանքը եւ հանդիպում մը ունեցաւ Դպրեվանքի աշակերտութեան հետ:

Դպրեվանքի Տեսուչ Գերշ. Տ. Շահէ Եպս. Փանոսեան խօսք առնելով ողջունեց Վեհափառ Հայրապետին ներկայութինը Դպրեվանքէն ներս: Ան իր շնորհակալութիւնը յայտնեց Վեհափառ Հայրապետին Դպրեվանքին նկատմամբ ցոյց տուած իր հայրական հոգածութեան համար: Ան միաժամանակ ըսաւ, թէ հակառակ իր բազմազբաղ վիճակին, Վեհափառ Հայրապետը շաբաթը անգամ մը կը բարձրանայ Դպրեվանք ու աստուածաբանութիւն կը դասաւանդէ աւարտական դասարանին:

Տեսչութեան անդամներու ներկայութեան, աշակերտութեան ուղղած իր պատգամին մէջ Վեհափառ Հայրապետը ըսաւ, թէ՝ ՙսովորական ուսումնարան մը չէ Դպրեվանքը. Դպրեվանքին մէջ հոգի կը կերտուի, մարդ կը կազմաւորուի, ազգին ու եկեղեցւոյ ծառայելու կոչում ունեցող մարդ կը պատրաստուի: Բնականաբար, ուսումը, զարգացումը, գիտութիւնը կարեւոր են, սակայն այդ բոլորը այլ դպրոցներու մէջ ալ կարելի է ստանալ: Դպրեվանքի իւրայատկութիւնը իր հոգեկերտումի առաքելութեան մէջ է՚: Ապա Վեհափառ Հայրապետը խօսելով մեր եկեղեցւոյ ու ժողովուրդի կարիքներուն մասին, ըսաւ. ՙԱւելի քան երբեք այսօր իրականութիւն է Աւետարանի հետեւեալ խօսքը թէ՝ “հունձք բազում են եւ մշակք սակաւ”: Մարդու կարիքը կը զգանք ամէն տեղ. մենք պէտք ունինք այնպիսի մարդու որ հաւատքով ու տեսիլքով, նուիրումով ու յանձնառութեամբ թրծուած է: Այս տիպի մարդիկ կը պատրաստէ ու պիտի պատրաստէ Դպրեվանքը, հետեւաբար, Դպրեվանք եկող աշակերտները ընտրուած են, որովհետեւ անոնք հոս կու գան նուիրական նպատակի մը պատրաստուելու համար՚:

Իր խօսքի աւարտին Վեհափառ Հայրապետը իր գնահատանքը յայտնեց Դպրեվանքի Տեսուչ Սրբազանին, Տեսչութեան անդամներուն եւ ուսուցչական կազմին, Դպրեվանքին նկատմամբ իրենց ունեցած սիրոյն ու ծառայութեան համար: Վեհափառ Հայրապետը նաեւ իր գնահատանքը յայտնեց Դպրեվանքի բարեկամներուն, բարերարներուն եւ այն բոլոր հաստատութիններուն, որոնք օգտակար ու մասնակից կը դառնան Դպրեվանքի սրբազան առաքելութեան իրագործման: Այս ծիրէն ներս Վեհափառ Հայրապետը յատուկ կերպով յիշեց Գալուստ Կիւլպէնկեան Հիմնարկութեան Հայկական Բաժանմունքը, որ տասնամեակներէ ի վեր իր կարեւոր նպաստը կը բերէ Դպրեվանքի հոգեմտաւոր կեանքի ծաղկման:

Յայտնենք որ յառաջիկայ օրերուն Դպրեվանքը կ’աւարտէ իր 2008–2009 կրթական տարեշրջանը: Ամրան արձակուրդի շրջանին աշակերտներուն մէկ մասը պիտի մնան Դպրեվանք իսկ մնացեալը պիտի մեկնին իրենց ծնողներուն մօտ:

ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ԴՊՐԵՎԱՆՔԸ

ԱՌԱՋՆԱԿԱՐԳ ԴԻՐՔԻ ՎՐԱՅ

Read in Arial Armenian font

05/31/2009

Լիբանանի Թեմի ազգային իշխանութեան ուսումնական խորհուրդըի կազմակերպած շարադրական մրցանքը, այս տարի եւս մրցանակաբաշխութիւն կատարեց լիբանանահայ վարժարաններու աշակերտներուն միջեւ տեղի ունեցած մրցանքին առաջին եւ երկրորդ դիրքերը գրաւող աշակերտներուն:

Եօթներորդ տարին ըլլալով, սոյն շարադրական մրցանքը, յատուկ խանդավառութիւն մը կը ստեղծէ հայկական վարժարաններ յաճախող աշակերտներուն մօտ, որոնք ամէն ճիգ ի գործ կը դնեն, իրենց վարժարանին անունն ու վարկ բարձրացնելու համար:

Այս տարի Մեծի Տանն Կիլիկիոյ Կաթողիկոսութեան Դպրեվանքը առաջնակարգ դիրք գրաւեց թէ՜ միջնակարգ եւ թէ երկրորդական բաժիններուն մէջ: Մրցանակաբաշխութեան ընթացքին, միջնակարգ բաժնի առաջին պարգեւին արժանացաւ Յակոբ Գարտանաքեան, իսկ երկրորդական բաժնի պարգեւին` Սամուէլ Լախոյեան եւ Մուրատ Չորպաճեան: Բարձր յիշատակութեան արժանի նկատուեցան նաեւ Հրայր Տաղլեան եւ Սերժ Թինքճեան:

Դպրեվանքի տեսչութիւնը բարձրօրէն գնահատեց առաջնակարգ դիրքերը գրաւող իր ուսանողները, եւ այս առիթով անգամ մը եւս շեշտեց հայալեզու դասանիւթերուն կարեւորութիւնը, որոնց նկատմամբ այնքան բծախնդիր է Մեծի Տանն Կիլիկիոյ Կաթողիկոսութեան Դպրեվանքը:

ՀԱՅԱՍՏԱՆԻ ԱՆԿԱԽՈՒԹԵԱՆ 91-ՐԴ ՏԱՐԵԴԱՐՁԻՆ

ՆՈՒԻՐՈՒԱԾ ՈԳԵԿՈՉՄԱՆ ԳԵՂԱՐՈՒԵՍՏԱԿԱՆ ՁԵՌՆԱՐԿ

ԴՊՐԵՎԱՆՔԷՆ ՆԵՐՍ

Read in Arial Armenian font

05/26/2009 

Նախաձեռնութեամբ Դպրեվանքի Տեսչութեան եւ կազմակերպութեամբ Դպրեվանքի Ուսանողական Խորհուրդին, Երեքշաբթի, 26 Մայիս 2009-ի յետմիջօրէին, ՙԲրաբիոն Տումանեան՚ հանդիսասրահէն ներս, տեղի ունեցաւ ուսումնական կրթական այս տարեշրջանին` 2008-2009-ի դասախօսական-գեղարուեստական վերջին յայտագիրը, նուիրուած` Հայաստանի անկախութեան 91-րդ տարեդարձին:

Բացման խօսքով հանդէս եկաւ Դպրեվանքի Ա. Ընծայարանի ուսանողներէն Սամուէլ Կիս.Սրկ. Լախոյեան, որ հակիրճ կերպով անդրադարձաւ 1918 Մայիս 28-ին կերտուած անկախութեան մասին, որմէ ետք ամփոփ կէտերու մէջ ներկայացուց օրուան բանախօսը` Դպրեվանքի Հայոց Պատմութեան դասախօս`  տիար Վիգէն Աւագեանը:

Ապա, Դպրեվանքի երգչախումբը ղեկավարութեամբ Փոխ Տեսուչ` Հոգշ. Տ. Մակար Վրդ. Աշգարեանի, երգեց Հայաստանի Հանրապետութեան պետական քայլերգը ՙՄեր Հայրենիք՚ը, ՙԽան՚ի եւ ՙՀայաստան՚ երգերը:

Ապա, տեղի ունեցաւ տեսաերիզի ցուցադրութիւն, որուն մէջ խտացուած էին 1917-1920 Հայաստանի անցուդարձերը: Ցուցադրութենէն ետք յարգելի դասախօսը ներկայացուց օրուան նիւթը: Ան խօսեցաւ Մայիս 28-ը նշելու անհրաժեշտութեան մասին, ինչպէս նաեւ այդ թուականին կարեւորութեան եւ մեր կեանքին մէջ յառաջ բերած իրադարձութիւններուն մասին: Իր խօսքին մէջ ան յատկապէս ըսաւ. ՙՄայիս 28-ին կերտուած անկախութիւնը կապուած է մեր վաղուան ընելիքին հետ՚, նաեւ ՙՊատմութիւնը միայն անցեալ չէ եւ հայ աշակերտը պէտք չէ միայն պատմութիւն սորվի սորվելու սիրոյն, այլ նայելով անցեալին, կարենայ ուղղել իր ներկան եւ որոշ տեսլական մը ունենալ ապագային նկատմամբ՚:

Յայտագրի աւարատին, Դպրեվանքի Տեսուչ` Գերշ. Տ. Շահէ Եպս. Փանոսեան, նախ իր ուրախութիւնը յայտնեց, որ այս տարեշրջանի գեղարուեստական ձեռնարկներու փակումը եղաւ Հայաստանի 91-րդ տարեդարձին նուիրուած դասախօսութեամբ: Սրբազանը վեր առաւ Հայրենի անկախութեան նուիրական գաղափարը, որուն տեսլականով թրծուած պէտք է ըլլայ իւրաքանչիւր հայ, ո՜ր տարիքին մէջ ալ գտնուի ան: Այս առիթով, իր շնորհակալական խօսքին առընթեր, Դպրեվանքի Տեսուչը բարձրօրէն գնահատեց ուսանողական խորհուրդը, որ ամբողջ տարուան վրայ երկարաձգուած ձեռնարկներով ճոխացուցած ու ջերմացուցած էր դպրեվանքեան ներքին կեանքը: Իր եզրափակիչ խօսքին մէջ, Սրբազանը պատուիրեց դպրեվանեցիներուն, որ տէր կանգնին իրենց ժառանգ թողուած սրբութիւններուն եւ աւանդութիւններուն, միշտ բարձր պահելով Հայ Առաքելական Սուրբ Եկեղեցին եւ հայ ազգն ու հայրենիքը:   

ԿԻՐԱԿՆՕՐԵԱՅ ՎԱՐԺԱՐԱՆՆԵՐՈՒ

ՄԱՍԻՆ ԴԱՍԱԽՕՍՈՒԹԻՒՆ

Read in Arial Armenian font

05/15/2009 

Նախաձեռնութեամբ Դպրեվանքի Տեսչութեան եւ կազմակերպութեամբ Դպրեվանքի Ուսանողական Խորհուրդին, Ուրբաթ 15 Մայիս 2009-ի, յետ միջօրէին Դպրեվանքի յարկին տակ, տեղի ունեցաւ դասախօսութիւն, ներկայացնելու համար ՙՀայ Եկեղեցւոյ Կիրակնօրեայ դպրոցները՚ նիւթը:

Բացման խօսքը կատարեց` Յարութ Կիս. Սրկ. Շխրտմեան, որ հակիրճ կերպով անդրադարձաւ Կիրակնօրեայ Վարժարաններու կարեւորութեան մասին մերօրեայ կեանքէն ներս: Ապա ներկայացնելով օրուան բանախօսը, բեմ հրաւիրեց զայն:

Օրուան բանախօսն էր, Լիբանանի Թեմի քահանայ հայրերէն, եւ Թեմի Կրօնական Խորհուրդի անդամ` Արժ. Տ. Սարգիս Քհնյ. Սարգիսեան, որ նաեւ գործօն մասնակցութիւն կը բերէ Լիբանանի Կիրակնօրեայ Վարժարաններու կազմակերպական աշխատանքներուն: Ան, իբրեւ նախկին դպրեվանեցի, իր ուրախութիւնը յայտնեց դարձեալ այս սրբազան յարկին տակ գտնուելուն, եւ դպրեվանեցին հետ խօսակից դառնալուն համար:  Ապա, պատմական ակնարկ մը նետեց Կիրկանօրեայ վարժարաններուն հիմնադրութեան պատմութեան: Երջանկայիշատակ Տ.Տ. Սահակ եւ Տ.Տ. Բաբգէն Մեծի Տանն Կիլիկիոյ Կաթողիկոսներու նախանձախնդիր ոգիին իբրեւ արտայայտութիւն, հայ մանուկին ու պատանիին քրիստոնէական դաստիարակութիւն ջամբելու այս հիմնարկը կեանքի կոչուած էր: Տէր Հայրը մէջբերումներ կատարեց Երանաշնորհ Տ.Տ. Սահակ Հայրապետի կոնդակէն, որով հիմը կը դրուէր Կիրակնօրեայ Դպրոցներու այնքան անհրաժեշտ կառոյցին:

Դասախօսութեան երկրորդ մասով, Տէր Հայրը  անդրադարձաւ այսօրուան կեանքէն ներս Կիրակնօրեայ Դպրոցներուն ունեցած անժամանցելի դերակատարութեան, իբրեւ շարունակութիւ