ՎԵՀԱՓԱՌ ՀԱՅՐԱՊԵՏԸ ԸՆԴՈՒՆԵՑ
ՀԱՅՈՑ ՑԵՂԱՍՊԱՆՈՒԹԵԱՆ ՈԳԵԿՈՉՄԱՆ ԿԵԴՐՈՆԱԿԱՆ ՅԱՆՁՆԱԽՈՒՄԲԸ
03/11/2010
Հինգշաբթի 11 Մարտ 2010-ին, Ն.Ս.Օ.Տ.Տ. Արամ Ա. Կաթողիկոս ընդունեց Հայոց Ցեղասպանութեան Ոգեկոչման Կեդրոնական Յանձնախումբը: Յիշեալ յանձնախումբին մաս կը կազմեն ներկայացուցիչներ երեք յարանուանութիւններէն եւ քաղաքական երեք կուսակցութիւններէն:
Յանձնախումբի անդամները Վեհափառ Հայրապետին պարզեցին նախօրոք իրենց ունեցած հանդիպումներուն արդիւնք եղող այն ծրագիրները, որոնք կը նախատեսուին յառաջիկայ Ապրիլ ամսուն տեղի ունենալիք Նահատակաց ոգեկոչման գծով:
Վեհափառ Հայրապետը լսելէ ետք ներկայացուած ծրագիրները, անհրաժեշտ թելադրութիւնները կատարեց յանձնախումբի անդամներուն, շեշտելով որ ոգեկոչման ընթացքին հարկ է յատուկ շեշտ դնել ազգային միասնականութեան, Ցեղասպանութեան ճանաչման եւ Թուրքիոյ կողմէ անոր ուրացման քաղաքակութեան վրայ:
Այս առիթով, Նորին Սրբութիւնը հաւաստիացուց, որ Մեծի Տանն Կիլիկիոյ Կաթողիկոսութիւնը միշտ զօրավիգ պիտի մնայ հայ ժողովուրդի իրաւունքներու ձեռքբերման գծով տարուող բոլոր աշխատանքներուն:
Ն.Ս.Օ.Տ.Տ. ԱՐԱՄ Ա. ԿԱԹՈՂԻԿՈՍ ԸՆԴՈՒՆԵՑ Հ.Մ.Ը.Մ.-ի ՄԻՋԻՆ ԱՐԵՒԵԼԵԱՆ ԵՐԿԻՐՆԵՐՈՒ
Բ. ԽՈՐՀՐԴԱԺՈՂՈՎԻՆ ՄԱՍՆԱԿԻՑՆԵՐԸ
03/07/2010
Կիրակի 7 Մարտ 2010-ին Հ.Մ.Ը.Մ.-ի Միջին Արեւելեան երկիրներու Բ. Խորհրդաժողովին մասնակիցները այցելեցին Անթիլիասի Մայրավանք, եւ ներկայ գտնուեցան Ս. Գրիգոր Լուսաւորիչ Մայր Տաճարին մէջ մատուցուած Ս. եւ անմահ պատարագի արարողութեան: Ապա, Ն.Ս.Օ.Տ.Տ. Արամ Ա. Կաթողիկոս հայրական սիրով ընդունեց զանոնք Վեհարանի դահլիճին մէջ:
Սոյն խորհրդաժողովին կը մասնակցին Լիբանանէն Հայաստանէն, Սուրիայէն, Քուէյթէն եւ Եգիպտոսէն ժամանած Հ.Մ.Ը.Մ.-ականներ՝ շրջանային վարչութեանց պատասխանատու անդամներշ շուրջ 35 հոգի:
Աջահամբոյրէն ետք, Նորին Սրբութիւնը իր հայրապետական քաջալերական ու գօտեպնդիչ խօսքերով խրախուսեց ներկաները, վեր առաւ սերունդներու դաստիարակութեան եւ մեր ազգային կեանքին մէջ ՀՄԸՄ-ի դերակատարութիւնը՝ ի Հայաստան եւ ի Սփիւռս աշխարհի:
ՀԱՅԱՍՏԱՆԻ ՀԱՆՐԱՊԵՏՈՒԹԵԱՆ
ՏԷՐ ԶՕՐԻ ԱՌԱՋԻՆ ՊԱՏՈՒՈՅ ՀԻՒՊԱՏՈՍԸ
ԱՆԹԻԼԻԱՍԻ ՄԷՋ
02/17/2010
Չորեքշաբթի 17 Փետրուար 2010-ի առաւօտուն, Հայաստանի Հանրապետութեան Տէր Զօրի առաջին Պատուոյ Հիւպատոս Տիար Սուրէն Վարդանեան այցելեց Անթիլիասի Մայրավանք: Մեծարգոյ Հիւպատոսը իր յարգանքն ու երախտագիտութիւնը յայտնեց Ն.Ս.Օ.Տ.Տ. Արամ Ա. Կաթողիկոսին, Հիւպատոսարանի բացման պաշտօնական հանդիսութեան առիթով, Բերիոյ Հայոց Թեմի Առաջնորդ Գերշ. Տ. Շահան Եպս. Սարգիսեանի միջոցաւ իր հաղորդած շնորհաւորութիւններուն համար:
Պատուոյ Հիւպատոսին կ’ընկերնար իր եղբայրը՝ Տիար Յարութ Վարդանեան, որ Տէր Զօրի Նահատակաց Մատրան թաղականութեան ատենապետն է, ինչպէս նաեւ անդամ՝ Վեհափառ Հայրապետին կողմէ նշանակուած Տէր Զօրի Յուշահամալիրի Կեդրոնական Յանձնախումբին:
Յայտնենք, որ անցեալ շաբաթ պաշտօնական բացում տեղի ունեցած էր Տէր Զօրի մէջ Հայաստանի Հանրապետութեան Պատուոյ առաջին Հիւպատոսութեան, որուն յանուն Վեհափառ Հայրապետին մասնակից դարձած էր Բերիոյ Թեմի Առաջնորդ Սրբազանը, ինչպէս նաեւ Հայաստանէն ու Սուրիոյ զանազան շրջաններէն պատասխանատու մարմիններու ներկայացուցիչներ:
ԵՐՈՒՍԱՂԷՄԻ ՆԱԽԿԻՆ ՊԱՏՐԻԱՐՔ ՍԱՊՊԱՀ
ԱՅՑԵԼԵՑ ԱՆԹԻԼԻԱՍ
02/16/2010
Երեքշաբթի 16 Փետրուար 2010-ին, Երուսաղէմի Լատին նախկին պատրիարք Սապպահ այցելեց Անթիլիաս, հանդիպում ունենալու Ն.Ս.Օ.Տ.Տ. Արամ Ա. Կաթողիկոսին հետ: Սապպահ պատրիարքին կ’ընկերանար Եկեղեցիներու Համաշխարհային Խորհուրդի բարձրաստիճան պատասխանատուներէն Դոկտ. Միշէլ Նսէյր:
Երկու անձնաւորութիւնները, պաշտօնապէս Վեհափառ Հայրապետին յանձնեցին Երուսաղէմի Եկեղեցիներուն կողմէ պատրաստուած այն յայտարարութիւնը, որուն ճամբով Երուսաղէմի եկեղեցիները խնդրամատոյց կ’ըլլան միջազգային համայնքին, պատժամիջոցներ հաստատելու Իսրայէլի դէմ, երկրէն ներս քրիստոնեաներուն դէմ ստեղծուած անընդունելի վերաբերումներուն համար:
Յայտնենք, թէ այս յայտարարութիւնը խստիւ քննադատուած է Իսրայէլի կառավարութեան կողմէ, անընդունելի համարուելով:
Սապպահ պատրիարք եւ Դոկտ. Նսէյր Վեհափառ Հայրապետին մանրամասնօրէն պարզեցին քրիստոնէական համայնքներուն դիմագրաւած դժուարութիւնները Սուրբ Երկրին մէջ: Իր տեսակէտները պարզելով, Նորին Սրբութիւնը քանի մը կէտերով շեշտեց ա) Միջ-քրիստոնէական գործակցութիւնը ամրապնդելու անհրաժեշտութիւնը, բ) Քրիստոնեայ-Իսլամ երկխօսութիւնը աշխուժացնելու կարեւորութիւնը, գ) Արտասահմանի եկեղեցիները ու յատկապէս Հայ Եկեղեցին պիտի շարունակեն զօրավիգ կանգնիլ պաղեստինեան դատին:
Վեհափառ Հայրապետը նաեւ ըսաւ, թէ Միջին Արեւելքի Եկեղեցիներու Խորհուրդը իր զօրակցութիւնը պիտի յայտնէ Երուսաղէմի Եկեղեցիներու հրապարակած վերոյիշեալ միացեալ յայտարարութեան:
ԱՐՑԱԽԻ ԱՐՏԱՔԻՆ ԳՈՐԾՈՑ ՆԱԽԱՐԱՐԸ
ԱՆԹԻԼԻԱՍԻ ՄԱՅՐԱՎԱՆՔԻՆ ՄԷՋ
02/10/2010
Չորեքշաբթի 10 Փետրուար 2010-ի վաղ առաւօտուն, Լիբանան ժամանեց Արցախի Արտաքին Գործոց Նախարար Գէորգի Պետրոսեան, նպատակ ունենալով մօտէն ծանօթանալ լիբանանահայ գաղութին հետ: Նախարարը հիւրընկալուեցաւ Մեծի Տանն Կիլիկիոյ Կաթողիկոսութեան Մայրավանքին մէջ:
Նոյն օր, կէսօրէ առաջ, Վեհարանին մէջ Պրն. Պետրոսեան, Լիբանանի մէջ Հայաստանի դեսպան Աշոտ Քոչարեանին ներկայութեամբ հանդիպում ունեցաւ Ն.Ս.Օ.Տ.Տ. Արամ Ա. Կաթողիկոսին հետ: Ապա, նախարարը եւ դեսպանը նախաճաշի հիւրը եղան Վեհափառ Հայրապետին: Յառաջիկայ երեք օրերու ընթացքին, ան Լիբանանի մէջ հանդիպումներ պիտի ունենայ լիբանանահայ քաղաքական երեք կուսակցութեանց պատասխանատու մարմիններուն, ինչպէս նաեւ գաղութի պատասխանատուներուն հետ:
ՎԵՀԱՓԱՌ ՀԱՅՐԱՊԵՏԸ ԸՆԴՈՒՆԵՑ
ԱՊՈՒ ԺԱՈՒՏԷ ԵՊԻՍԿՈՊՈՍԸ
02/08/2010
Մարոնի եկեղեցւոյ պատրիարքական փոխանորդ Ռոլան Ապու Ժաուտէ Եպիսկոպոս, Երկուշաբթի 8 Փետրուար 2010-ին, հանդիպում մը ունեցաւ Ն.Ս.Օ.Տ.Տ. Արամ Ա. Կաթողիկոսին հետ, Անթիլիասի Մայրավանքին մէջ:
Հանդիպման ընթացքին քննարկուեցան Լիբանանի այժմու կացութեան վերաբերող հարցեր, որոնց մասին Ապու Ժաուտէ Եպիսկոպոս տեղեկութիւններ փոխանցեց Նորին Սրբութեան, բխած Մարոնի Եպիսկոպոսներու վերջին ժողովի արդիւնքէն: Լիբանանի համայնքներու եւ յատկապէս միջ-քրիստոնէական գործակցութեան առնչութեամբ, Վեհափառ Հայրապետը իր թելադրութիւնները կատարեց:
Մար Մարունի տօնին առիթով նաեւ, Արամ Ա. Կաթողիկոս շնորհաւորեց Մարոնի եկեղեցին, խնդրելով որ Ապու Ժաուտէ Եպիսկոպոսը Ամենապատիւ Սֆէյր Պատրիարքին հաղորդէ, իր շնորհաւորութիւնները յանուն Հայ Եկեղեցւոյ:
ՎԵՀԱՓԱՌ ՀԱՅՐԱՊԵՏԸ ԸՆԴՈՒՆԵՑ
ՎԵՐԱՊԱՏՈՒԵԼԻ ԻՎ ԿԸՆԷԼԸ
02/06/2010
Ֆրանսայէն դուրս գտնուող Բողոքական Եկեղեցիներու Միութեան նախագահ Վեր. Իվ Կընէլ, Շաբաթ 6 Փետրուար 2010-ին այցելութիւն տուաւ Անթիլիասի Մայրավանք, հանդիպում ունենալու Ն.Ս.Օ.Տ.Տ. Արամ Ա. Կաթողիկոսին հետ: Անոր կ’ընկերանար Վեր. Ռոպէր Սարգիսեան:
Խօսակցութեան նիւթ դարձան միջ-եկեղեցական շարք մը հարցեր, ինչպէս նաեւ Եւրոպայի, Միջին Արեւելքի ու Արեւմտեան այլ երկիրներու Եկեղեցական Խորհուրդներուն միջեւ գործակցութեան հեռանկարային ծրագիրներ:
Վեհափառ Հայրապետը յատկապէս ծանրացաւ Միջին Արեւելքի մէջ քրիստոնէութեան ներկայութեան ու վկայութեան, որուն համար եկեղեցական խորհուրդներու հետ գործակցութիւնը կենսական նկատեց: Կողմերը նաեւ քննարկեցին ընկերային ու մարդասիրական ծառայութեան նոր կարելիութիւնները, յատկապէս տնտեսական ճգնաժամ ապրող երկիրներու եւ ժողովուրդներուն զօրակցութիւն ցուցաբերելու իմաստով: