ՄԵԾԻ ՏԱՆՆ ԿԻԼԻԿԻՈՅ ԿԱԹՈՂԻԿՈՍՈՒԹԵԱՆ ԿՈՂՄԷ ՑԵՂԱՍՊԱՆՈՒԹԵԱՆ 100–ԱՄԵԱԿԻՆ ԱՌԻԹՈՎ ԻՐԱԳՈՐԾՈՒԵԼԻՔ ՇԻՆԱՐԱՐԱԿԱՆ ԾՐԱԳԻՐՆԵՐ

Հայկական Ցեղասպանութեան 100–ամեակին առիթով Մեծի Տանն Կիլիկիոյ Կաթողիկոսութեան նախաձեռնութիւններու ծիրէն ներս նաեւ նկատի առնուած են շինարարական կարեւոր ծրագիրներ, որոնք յառաջիկայ երկու տարիներու ընթացքին պիտի իրագործուին Վեհափառ Հայրապետին, Ազգ. Կեդր. Վարչութեան ու Կաթողիկոսարանի ճարտարապետներու անմիջական հսկողութեան ներքեւ:

 

ՊԻՔՖԱՅԱՅԻ ՅՈՒՇԱՐՁԱՆԻ ՎԵՐԱՆՈՐՈԳՈՒՄ ԵՒ ՇՐՋԱՊԱՏԻ ԸՆԴԼԱՅՆՈՒՄ

1-The maquet Bikfaya map showing the building and parking

1965–ին, Հայկական Ցեղասպանութեան 50–ամեակին առիթով համազգային ճիգով ու մասնակցութեամբ բարձրացաւ հայ ժողովուրդի վերածննդեան յուշարձանը Պիքֆայայի մէջ: Յուշարձանին քանդակագործն է Զաւէն Խտըշեան:

100–ամեակին առիթով Վեհափառ Հայրապետին գլխաւորութեամբ Կաթողիկոսարանը որոշեց ընդարձակել յուշարձանի շրջապատը եւ նոր ծրագիրներով աւելի փայլք ու կարեւորութիւն տալ յուշարձանին ու անկէ եկող խորհուրդին ու պատգամին: Այս գծով հետեւեալ ծրագիրները մշակուած են.– ա) Յուշարձանը ենթարկել վերանորոգումի: բ) Իր շրջապատը ընդլայնել եւ հոն առաջնորդող ճամբան սալայատակել: գ) Յուշարձանին կից, պատին վրայ զետեղել Հայկական Ցեղասպանութեան քարտէսը: դ) Յուշարձանին մօտ խորան շինել՝ նուիրուած մեր նահատակներուն: ե) Դէպի Յուշարձան առաջնորդող ժայռերը եւ պատերը զարդարել հայոց պատմութեան, հայ եկեղեցւոյ ու Ցեղասպանութեան առնչուած խորհրդանիշերով: զ) Դէպի վանքը առաջնորդող մուտքն ու ճամբան ընդլայնել:

Շինարարական այս աշխատանքները բնականաբար կ’ենթադրեն նիւթական կարեւոր ներդրում: Վեհափառ Հայրապետին մօտեցումը այն է, որ յիշուած իւրաքանչիւր բաժին ունենայ իր բարերարը: Արդէն երեք ազգայիններ իրենց յանձնառութիւնը կատարած են այս ուղղութեամբ: Նկատի ունենալով այս մեծ ծրագիրին համազգային կարեւորութիւնը, թելադրելի է որ մեր ունեւոր ազգայինները կամ մասնակից դառնան շինարարական ծախսերուն եւ կամ յանձն առնեն մնացեալ շինարարական ծրագիրներու իրագործումը:

 

ՑԵՂԱՍՊԱՆՈՒԹԵԱՆ ԹԱՆԳԱՐԱՆ ԹՌՉՆՈՑ ԲՈՅՆԻՆ ՄԷՋ

2-Birds Nest museum

Թռչնոց Բոյնի կառոյցէն ներս կը գտնուի հաստատութեան ամենահին շէնքը, որ նաեւ որպէս ճարտարապետական կառոյց պատմական–հնագիտական արժէք ունի: Վեհափառ Հայրապետին ու Ազգ. Կեդրոնական Վարչութեան որոշումով, յիշեալ շէնքը պիտի վերածուի Ցեղասպանութեան թանգարանի: Թանգարանին մէջ պիտի զետեղուին ընդհանրապէս Ցեղասպանութեան ու յատկապէս որբերու ու այդ շրջանի մեր ժողովուրդի գաղթական զաւակներուն կեանքին առնչուած իրեր, նկարներ, յուշագրութիւններ, եւայլն.: Վստահաբար մեր ժողովուրդի զաւակներուն մօտ տակաւին կը գտնուին իրեր կամ նկարներ Ցեղասպանութեան շրջանին առնչուած: Կոչ կ’ուղղենք որ անոնք փոխանցուին Ցեղասպանութեան թանգարանին:

Յիշեալ ծրագիրին բարերարն է Իտալիայէն Ազգային Բարերար Տէր եւ Տիկին Ալեքքօ եւ Անի Պէզիկեանի զաւակը՝ Տիար Արամ Պէզիկեան:

 

ԱՆԹԻԼԻԱՍԻ ՆԱՀԱՏԱԿԱՑ ՄԱՏՐԱՆ ՎԵՐԱՆՈՐՈԳՈՒՄ

3-Memorial for the Martyrs of the 1915 Armenian Genocide in Antelias

Անթիլիասի Նահատակաց Մատուռը շինուած է 1938–ին: Ան վերանորոգուած է 1993–ին եւ 2007–ին: Մատուռը պիտի ենթարկուի ամբողջական ու հիմնական վերանորոգումի: Վերանորոգումի ծախսերը պիտի հոգացուին իտալահայ Ազգային Բարերար Տէր եւ Տիկին Ալեքքօ եւ Անի Պէզիկեանի զաւկին՝ Տիար Զարեհ Պէզիկեանի կողմէ:

Յիշեալ երեք ծրագիրներուն գծով գործնական աշխատանքները արդէն սկսած են: